السلام عليكم مساء الخير على الجميع اليوم رجعتي للسعودية ولله الحمد وهذا تقرير تجربتي في تايلند شاملة التكاليف كانت من ١٤ جون الى ٢٤.
الطيران : طلعت عن طريق الخطوط السعوديه من جدة
العدد: شخصين
التكلفة : 5868 ريال
اول يومين في بانكوك
سكنت في فندق Lancaster Bangkok الفندق جميل وهادي كذلك الطاقم ممتاز الفطور عندهم متنوع وعندهم كم صنف حلال طلبوا مني تامين ٢٠٠٠ بات.
الفعاليات في بانكوك
وبالنسبة لفعاليات بانكوك رحت للسكاي ووك وكان في لعبه بالدور الاول ناسي اسمها واقع افتراضي تختار بين ثلاث اماكن غابة فضاء جبال . فكرتها انك لابس بارشوت ولازم تدخل الدوائر وتحقق نقاط وكانت تجربة ممتازه مع السكاي ووك. كذلك استمتعت بالمناظر والتصوير. و صادف وقت زيارتي صلاه العصر وسالتهم عن مكان اصلي فيه وماقصروا علموني على مكان قريب منهم.
ثالث يوم تجربتي في تايلند: التوجة الى بوكيت
اليوم التالي صحيت وعلى مطار دون موينج عشان رحلة بوكيت استقعدوا لي بالمويه وعلب زبادي ما تدخلها معاك . وللعلم سافرت عن طريق طيران اسيا اقتصادي زي اديل وماشي حاله.
السكن من اليوم الثالث الى الخامس
سكنت اول ثلاث ايام في فندق Wyndham Grand Phuket Kalim Bay جناح واطلالة على المسبح الفندق حلو لكن ما راح اكرر التجربة بسبب صعوبة التنقل فيه . كل ماتبغى تنزل أو ترجع الغرفه لازم تطلب سياره واشوفه مشوار ومضيعة وقت. أما بالنسبه للفطور ماشي حاله، وتعشيت عندهم طلبت برجر دجاج وبيتزا كلاسيك عادي يمشون الحال.
السكن من اليوم السادس الى الثامن
اخر ثلاث ايام سكنت في فندق بولمان بوكيت أركاديا نايثون بيتش الفندق حلو وفخم كذلك ما راح اكرر التجربة لنفس سبب ويند هام وطلبوا ادفع ٦٠٠٠ الاف بات تامين ومشتريات من داخل الفندق مطعم مساج سياره توديك واذا مااستخدمت شيء تاخذها عند الخروج والفطور عندهم يمشي الحال.
فعاليات بوكيت في تجربتي في تايلند
بالنسبة للفعاليات في بوكيت استاجرتها من مكتب واحد تايلاندي من مواليد السعوديه لكن سعره اغلى من الكشكات اللي بالشوارع وهذي الفعاليات :
١- جزيره في في ايلاند اخذتها ب ١٨٠٠ بات ويوم وصلت وشرحوا لنا وش بيصير قالوا عندنا تجربه غوص اللي يحب ب ٢٢٠٠ بات وماندمت عليها وجربت كذلك الجت سكي ناسي كم سعره.
٢- زبلاين +ركوب فيله + دبابات + شوتنق
٣- المدينة المائية + ركوب الخيل Kamala Horse Riding Club
٤- الباراشوت في شاطئ باتونغ
٥-بوكيت القديمة اسواق وكافيهات
المدينة المائية
اخر يومين: العودة إلى بانكوك
اخر يومين كانت في بانكوك سكنت هناك في فندق Avani Sukhumvit Bangkok فندق عادي وطلبوا ١٠٠٠ بات تامين. يوجد جنبه مول صغير وستاربكس وماركت يمشي الحال كما أنه قريب من مطار دون موينج الداخلي.
اهم الملاحطات والنصائح
- بالنسبة لاسعار، الاكل والفعاليات والتنقل تختلف من شخص لشخص لكن اشوف اقل من١٠ الاف ماتسوي شيء فأحسب حسابك بمبلغ زياده.
- لأ تسكن في منتجعات وفنادق فخمه أول ايام رحلتك لانك ماراح تستفيد من خدماتهم، يومك كله برا وترجع وقت النوم. نصيحة احجز بأماكن قريبة من الفعاليات واخر يوم ولا يومين احجز في فندق أو منتجع فخم وانبسط بالاستجمام
- الفنادق والطيران تقدر تحجز بنفسك ما تحتاج لمكتب سياحي وترا اوقات يكون سعر المكتب اقل فقارن واسال وشوف
- اصرف دولارت من السعوديه وحولها لا وصلت ولا تصرف بالمطار إلا حق اول يوم بس. بعد كذا اصرف عند ابو داود في شارع العرب ولا تدور غيره هو افضل واحد في بانكوك. وفي بوكيت متفاوته اسعار الصرف اقل واحد حصلته ب ٣٠ دولار واعلى واحد ب ٣٤.٤٠ دولار. وفي ممكن اكثر تحتاج تبحث واذا ماعندك وقت اصرف عند اي احد.
- استخدموا قراب وبولت للتنقل رخيص وعانيت من سواقين بولت مره يرفضون مره يقولون بنوديك لكن زيد بالسعر. ونصيحة قبل ما تطلب بولت خلك في مكان واضح لانهم يستهبلون ولا تطلب وانت بالغرفه اطلب باللوبي.
- إذا اتفقت مع سواق للتنقل اساله كم ياخذ ع الساعه . اتفقت مع واحد على ٣٠٠ ونصيحة لاتاخذون خساره فلوس على الفاضي مايحتاج ابد .
- إذا تحتاجون غسيل ملابس مالكم إلا الفنادق اضمن بس ترا غاليين لكن تنحد عليهم وين تروح تدور لمغسلة بس حاولوا فيهم يسوون لكم خصم.
- حصل معاي موقف في بوكيت مع سواق التاكسي عطيته عنوان الفندق و قال ب٨٠٠ بات ومشينا على العنوان فجاه وقف قال بدخل المبنى دقيقه واجيكم دخل هو وخرجوا اثنين ثانيين حرمه ورجال جت الحرمة وقالت لي ممكن تنزل معاي وتوريني عنوان الفندق السواق ما يعرف طبعاً رفضت وقالت ورني طيب بالجوال ووريتها يوم رجعت سالته تعرف عنوان الفندق قال لي ايه وعلمته باللي صار جلس يستهبل وانه ماعليك فيها هذي تشيك علينا فانتبهوا.
في الختام قدمت لكم تقرير تجربتي في تايلند مع التكاليف اتمنى يكون فيه الفايدة.
