السلام عليكم، بعطيكم تقرير عن تجربتي في البوسنة والهرسك فيه اهم تفاصيل الرحلة والأنشطة اليومية خلالها وان شاء الله يفيدكم
سافرنا ١٤ يوم، من ٣٠ سبتمبر ل ١٣ اكتوبر
الثلاثة الايام الاولى: مدينة سراييفو
جلسنا ٣ ايام في سراييفو ، والإقامة كانت في فندق هوليداي، بالنسبة للفطور كان متنوع وجميل، أما موقع الفندق، فكان موقع مركزي قريب من مول الشدي ومول ثاني نروح لهم مشي.
بخصوص التنقّل استأجرنا سيارة من الأخ عاصم قولف ترافل وكان جداً محترم وخدوم، كذلك عطانا دافور وسجاده وحتى كوره للأطفال. لذلك أنصحكم بالتعاون معه.
من أهم الأماكن الي زرناها في سراييفو كانت حديقة فريلو ، الحديقة عبارة عن مساحات كبيرة خضراء وفيها أشجار كثيرة، أيضاً فيها نبع ماء وبركة وتعتبر مصدر لنهر البوسنة، كذلك فيها مطعم وعدد من المقاهي.
وأيضاً زرنا السوق القديم والمعروف أيضاً بباشجارشيا المدينة القديمة سراييفو، كان مكان رائع كله حيوية اتعرّفنا من خلاله على تاريخ وثقافة سراييفو، أيضاً يوجد فيه أماكن كثيرة لتناول الطعام ومتاجر مختلفة للتسوّق.
اليوم الرابع والخامس: جبل فلاسيتش – تجربتي في البوسنة
بعدها طلعنا على جبل فلاسيتش وجلسنا يومين في فندق بلانكا، بالنسبة لأصناف الفطور كانت محدودة، لكن الفندق ككل كان جميل، ويتميز بمنفذ مباشر للتزلج إذا كنتوا من عشاق هذه الرياضة وصادفت زيارتكم فصل الشتاء.
اليوم السادس: مدينة دوني واقف
بعد جبل فلاسيتش انطلقنا لزيارة مدينة دوني واقف ، وتغدينا بـ مطعم ساميشنيتسا، وهو مطعم جميل والاكل لذيذ والسعر معقول، وأكثر شيء يميزه إنه بجوار النهر والشلات الصغيرة الي بتصب في النهر.
اليوم السابع والثامن: مدينة يايتسي
بعد ذلك رحنا نقضي يومين في مدينة يايتسي والسكن كان في فندق بلفسكو مقابل بحيرة بليفا. الفندق جميل وأجمل شيء فيه الإطلالات الي يوفرها على البحيرة لكن خيارات الفطور محدودة
بخصوص سلبيات الفندق كانت فقط عدم وجود مصاعد
بالنسبة لـ بحيرة بليفا فيها تأجير قوارب وسفن والموقع حلو لكن يبيلها يوم و حنا عائله واطفال. لذلك اخذنا يومين وزرنا الطواحين المائيه والشلالات الي موجودة بالقرب من البحيرة.
اليوم التاسع والعاشر: بيهاتش
بعد كذا توجهنا لمدينة بيهاتش، قضينا يومين في فندق اوبال، الفندق كان جميل والفطور متنوع والإطلالات جميله على نهر أونا.
لكن من ضمن السلبيات أن البلكونة كلها بيوت عنكبوت ما قدرنا نفتحها والنوافذ خطره جداً للي معهم أطفال ولا فيه احد يساعدك بنقل الشنط
اليوم الحادي عشر: موستار
بعد بيهاتش توجهنا لمدينة موستار وأقمنا يوم واحد في فندق مطعم كريفا كوبريا. الفطور متنوع، الموقع ممتاز قريب من السوق القديم ويطل على نهر رادوبولجا وفيه مجموعة مطاعم
السلبيات ما في مصاعد، الدرج جداً متعب، والطرق ما تمشي فيها عربية الأطفال
اليوم الثاني والثالث عشر: سراييفو
بعدها توجهنا لمدينة سراييفو، قضينا يومين في بيت عطلات زيلينا أوازا ، المكان جميل جدا وفيه خصوصيه كامله وأمان من بعد الله، وكذلك إطلالته رائعة على المدينة
متوفر فيه كل أدوات المطبخ، أدوات التنظيف، كل شي متوفر فيه، والحوش واسع والأبواب حديد، وأخذنا راحتنا فيه مره خصوصيه
صاحب الفندق رجل محترم وخلوق، حصل لنا مشكله وطلبناه للمساعدة وساعدنا وجاب الإسعاف ووقف معنا بدون أي مقابل جزاه الله خير
بعدها اخذنا فندق نوفوتيل ، جميل الفطور فيه ومتنوع ويعتبر افضل فطور شفته بالبوسنه، موقعه أيضاً رائع قريب منه نهر وعلى بوابته فيه كوفي حلو
وزرنا ملاهي صن لاند ، الملاهي جميله جداً وفيها الزحليقه الصيفيه ممتعه ما ينشبع منها ومناسبة للكبار والصغار، وفيه مطعم اكسجين مع اطلاله على المدينه والاكل الي يقدمه لذيذ جداً
بعدها رجعنا الشدي مول ، مول كبير في كثير متاجر ومركز ترفيهي ومطاعم وكافيهات عالمية، اخذنا عسل من محل Bee Japa بقبو المول وغلفته لنا وانطلقنا للمطار العسل تغليف المحل وبعدها حطيته بالشنط بين الملابس باماكن متفرقه والحمدلله وصل بالسلامه
ملاحظاتي خلال تجربتي في البوسنة
إيجابيات البوسنه
- البوسة تتيمز بطبيعة خلابة ورائعة وصادف وقت زيارتنا خلال فصل الخريف، كانت ألوان الأشجار يسحر، احمر مع برتقالي واصفر واخضر، جميع الألوان ما شاء الله
- الأمان، كل الأماكن الي زرناها ما واجهنا أي مشاكل من أي نوع
- طيبة البوسنيين، الشعب هناك كلهم متعاونين ومرحبين دائماً بالسُياح وعلى طول يقدمون خدماتهم ومساعداتهم
- المخابز عندهم مميزة وبالتحديد الفطائر طعمها رائع جداً
- أسعار بعض المطاعم رخيصة وفي نفس الوقت كان مذاق أكلها يجنن
سلبيات البوسنه
- المطاعم أكلهم مو متنوع وأغلب الأطباق الي عندهم مكونة من اللحوم، فالأشخاص النباتيين يعانوا شوي لما يزوروها
- بعض الفنادق كان في مشكله ب افياش الكهرباء تفصل وتشتغل، وبشكل عام الكهرباء كان تفصل عدة مرات خلال اليوم
ومن رايي موستار ما تستاهل تجلس فيها، المدينة صغيرة ونص يوم كافي لزيارتها، وبيهاتش ما تستاهل العنوه مع ان الاغلب يمدحها.
طبعاً هذا الختام ل تجربتي في البوسنة والهرسك اتمنى اكون أفدتكم ودمتم سالمين.
Booking.com
