الرئيسية > التقارير > اوروبا > ايطاليا > تأشيرة ايطاليا

تأشيرة ايطاليا

بحسب خبرتي وشغلي في مكتب تأشيرات أحب افيدكم بمعلومات مختصرة ومفيدة عن تأشيرة ايطاليا

طبعا ايطاليا تابعة لدول الاتحاد الأوروبي فتأشيرتها تكون تأشيرة شنغن و اللي هي لما تطلعها تقدر تدخل فيها على أي دولة اتحاد أوروبي.

طبعا السؤال اللي دايما ينسأل بخصوص تأشيرة الشنغن هو من أي دولة أطلع؟ دولة أول وصول و لا أطول اقامة؟

الشي الرسمي هو انه تطلع دولة أطول اقامة

لكن في بعض الدول – مثل المانيا و هولندا و بلجيكا – ما تقبل انه تدخل عليها أول وصول بتأشيرة دولة ثانية. يعني ما تقدر تدخل المانيا بفيزا ايطاليا– يوقفوك بالمطار و يسألونك و اذا ما عرفت تتفاهم وياهم انه اطول مدة في ايطاليا – بيردوك على اول طيارة للسعودية.

و باقي الدول عادي تطلع تأشيرة منها و تروح اول وصول على دولة ثانية و تتنقل بين دول الشنغن

مثلا – تقدر تطلع تأشيرة ايطاليا و يكون اول وصول لك سويسرا– و ممكن تطلع فيزا ايطالية و انت بتجلس فيها يومين بس و بعدها تتنقل

كيف؟

الأجراءات خطوة بخطوة:

قبل لا تسوي أي شي، لازم تحجز لك موعد للبصمة في مركز التأشيرات الموحد و هذا يكون على الموقع الرسمي لهم – و من شروط السفارة انه موعد البصمة يكون بينه و بين تاريخ السفر 90 يوم أقل شي – يعني لو سفرتك بعد 4 شهور بتنتظر شهر و تبدأ الاجراءات.

اول شي تدخل موقع ال VFS تختار من السعودية الى ايطاليا

بعدين تسجل حساب بالايميل الخاص بك

و تختار مكان البصمة – الرياض او جدة او الخبر

بعدين تدخل بيانات الجوازات الأشخاص المسافرين و تحدد موعد يناسبك

بياخذك على السداد و يكون تكلفته حوالي 50- 80 ريال للفرد الواحد

تحفظ ورقة الموعد و تبدأ تجهز الأوراق اللي بتروح فيها على الموعد

و هي:

ورقة تأكيد الموعد تطبعها هذي أهم شي ما تدخل بدونها

1 الجواز الأصل (فيه صلاحية لا تقل عن 6 شهور)

2 تعريف بالراتب انجليزي موجه للسفارة و مختوم من جهة العمل – و اذا جهة خاصة مصدق من الغرفة التجارية

3 كشف حساب لاخر 3 شهور انجليزي و مختوم من البنك و رصيد الاغلاق لا يقل عن 15 الف ريال للفرد الواحد


4 صور شخصية (2) مقاس 3.5*4.5 بخلفية بيضا و مكشوف الراس للرجال اما الحريم تكون الجبهة مع منابت الشعر واضحين

5 ابليكشن لكل فرد

6 تأمين سفر يغطي مدة الرحلة

7 حجوزات طيران و فنادق على مدة الرحلة و يفضل تكون كلها بايطاليا

و هنا يكون كل التركيز

حجوزات الطيران و الفنادق اللي تقدمها للسفارة مب ضروري تكون فعلية أو مؤكدة

تقدر تسوي طيران وهمي و حجز فندق وهمي من على بوكينج و تقدمه للسفارة

وممكن تسويه ب 7 ايام و انت اصلا رحلتك شهر

و تسوي كل المدة بايطاليا و انت اصلا مب ناوي تروح عليها او بتجلس فيها يومين بس

و بدون ما تقلق للحظة

لأن هذي الحجوزات اجراء رسمي للسفارة فقط – و ماله داعي تحجز و تدفع مبالغ و ممكن تطول التأشيرة أو يحصل لك أي ظرف و يروح عليك المبلغ

أهم نقطة انه تكون حجوزات الطيران و الفنادق و مدة التأمين كلها متوافقة – يعني تبدأ و تنتهي بنفس التاريخ

بعد ما تجهز هذي الأوراق تروح فيهم على الموعد تقدمهم و تبصم – رسوم الفيزا تدفعها عندهم و تتراوح بين 250-350 ريال للفرد

و يعطوك ايصال بالمبلغ و هو اللي تروح تستلم فيه الجوازات لما تجهز – أوتطلب خدمة أرامكس من المركز برسوم اضافية.

طبعا انت تكون مدخل جوالك و ايميلك في البيانات بموقع السفارة و بيرسلوا لك عليه اشعارات بحالة الجوازات تتابعها اول بأول الى ان يكون جاهز للاستلام. و الاجراء عادة ياخذ من 3 الى 15 يوم عمل.

و خلاص كذا فيزت على ايطاليا و تقدر تدخل فيها على أي دولة اوروبية – ماعدا المانيا و هولندا و بلجيكا – تدخلهم فقط بعد دولة أول وصول كوجهة ثانية مب أولى.

ملحوظة هامة

تأشيرة ايطاليا لما تطلع تكون بدايتها من تاريخ السفر اللي تحطه في الابليكشن و الحجوزات و التأمين و ما ينفع تسافر قبل هالتاريخ – و لازم تختار تاريخ بينه و بين موعد البصمة 15 يوم على الأقل.

مدة التأشيرة

هذا أكثر شي الكل يقلق منه – كم المدة اللي بتطلع فيها التأشيرة و الجواب للأسف ما يمكن تحديده ابد

ما في أي شي بالاجراءات يخليك تختار مدة الفيزا – هذا شي يحدده الموظف اللي جالس بالسفارة وفق معايير خاصة بهم – الشي الوحيد اللي ممكن يساعد شوي في مدة طويلة هو انه تكون مطلع فيزا قبل.

ملاحظة:

  • لو ما تقدر تجيب تعريف بالراتب أو كشف حساب لنفسك ممكن الاب او الام او الزوج او الزوجة يطلع لك و تاخذهم مع صورة من جوازه و خطاب تكفل يوقعه المتكفل (ما ينفع يتكفل اخ باخته او العكس في اجراءات ايطاليا).
  • الأطفال تحت 12 سنة مب لازم يحضروا موعد البصمة – تاخذ جوازتهم وصورهم بس
  • لو مسافرين عيلة مع بعض شخص واحد فقط اللي يطلع تعريف الراتب و كشف الحساب بس لازم يكون الكشف فيه رصيد كافي يغطي عدد المسافرين بحد ادنى 10 الاف ريال لكل فرد – مع صورة من بطاقة العائلة مترجمة.
Booking.com
هل كانت الصفحة مفيدة؟

شارك المقال:

حمل تطبيق المسافرون

كل هذه المعلومات وأكثر موجودة في التطبيق

أضف تعليق